Մանուկների ու պատանիների ամառային հանգիստն արդյունավետ եւ հետաքրքիր կազմակերպելու նպատակով Հայաստանյայաց Ավետարանական եկեղեցին Ամերիկայի Հայ Ավետարանչական Ընկերակցության աջակցությամբ, Հայաստանի ու Արցախի տարբեր քաղաքներում բակային ճամբարներ է իրականացնում:
Աբովյան քաղաքում բակային ճամբարը սկսվեց հունիսի 19-ին եւ տեւեց 7 օր: Այդ օրերին 110 երեխա հնարավորություն ունեցավ լսելու Քրիստոսի Բարի Լուրը, մասնակցելու Աստվածաշնչյան դասերին: Ճամբարային օրերին երեխաները լսեցին Աստվածաշնչյան պատմություններ, որոնք բացահայտեցին Հիսուս Քրիստոսին որպես «Բարի հովիվ», «Կենաց Հաց», «Հարություն», «Աշխարհի Լույս» եւ «Ճանապարհ»: Հոգեւոր կրթությանը զուգահեռ, երեխաները առավոտյան ժամը 10-ից մինչեւ 15.00-ը դահլիճային ու էստաֆետային խաղեր էին խաղում, միասին ճաշում էին, երգել ու պարել սովորում, զվարճալի տիկնիկային թատրոններ ու ներկայացումներ դիտում, ձեռային աշխատանքներ պատրաստում: Ճամբարի վերջին օրը համերգային ծրագրով հանդես եկավ մանկական հոգեւոր երգերի հեղինակ եւ կատարող Թամար Ալբարյանը: Երգերի միջակայքում Թամարը տարատեսակ քիմիական փորձերով ոչ միայն զարմացրեց երեխաներին, այլեւ ամփոփեց ճամբարի ընթացքում երեխաների լսած Աստվածաշնչյան թեմաները՝ եւս մեկ անգամ անդրադառնալով Աստծո Փրկության Բարի Լուրին:
Հայաստանյաց Ավետարանական Եկեղեցու Բաղրամյան 18-ի «Էմանուել» բակային ճամբարը մեկ շաբաթ շարունակ իր հարկի տակ համախմբեց ավելի քան 100 երեխայի՝ կենտրոն և հարակից այլ վարչական շրջաններից: Բակային ճամբարի ընթացքում երեխաները Աստվածաշունչը սերտելուն զուգահեռ, մեկ ընտանիքի պես, դրսեւորեցին իրենց շնորհներն ու վայելեցին ամառային հանգիստն իր բոլոր յուրահատկություններով՝ ջրային խաղեր, լողավազան, ձեռային աշխատանքներ, պարեր եւ այլն: Մեկշաբաթյա ճամբարական կյանքը ավարտվեց կիրակնօրյա պաշտամունքով, որին մասնակցեցին երեխաները, ծնողներն ու եկեղեցու անդամները: Երեխանեը պաշտամունքին երգեցին ճամբարի ընթացքում սովորած հոգևոր երգերը, իսկ եկեղեցու հովիվ Վեր. Հովհաննես Հովսեփյանը ճամբարականների համար օրհնության աղոթք բարձրացրեց:
Այս տարի ևս ճամբաիրն իր մասնակցությունը բերեց եգչուհի Թամար Ալբարյանը: Երգչուհու ներկայությունը յուրօրինակ աշխուժություն հաղորդեց ճամբարականների կյանքին:
Բակային Ճամբարն իրականություն դարձավ Հայաստանյաց Ավետարանական Եկեղեցու ՔԴ բաժնի և Ամերիկայի Հայ Ավետարանչական ընկերակցության համատեղ ջանքերով: Ճամբարականներին խաղեր և հոքևոր գրականություն նվիրեց «Բիբլիական Միավորում» ԿՄ ՀԿ-ն:
Ստեփանավանում մանուկների բակային ճամբարը երկու հերթափոխով իրականացվեց: Սկզբում՝ հունիսի 12-16-ը Ստեփանավանի ՀԱԵ-ն հյուրընկալեց 108 մանուկի, այնուհետեւ՝ հուլիսի 3-7-ը եւս 105-ի: Ճամբարի մասնակիցները Ստեփանավանի եւ հարակից 4 գյուղերից 7-13 տարեկան մանուկներն էին: Ճամբարային 5 օրերի ընթացքում երեխաները հնարավորություն ունեցան լսելու Աստվածաշնչյան պատմություններ, հասկացան, որ Աստված իրենց հրավիրել է դառնալու Աստծո զավակները, նմանվել Հիսուսին և լինել արդար, օգնող, ներող ու պատրաստ մարդկանց պատմելու Աստծո սիրո մասին: Հոգևոր կրթությանը զուգահեռ երեխաները էստաֆետային ու դահլիճային խաղեր խաղացին, սովորեցին երգել, պարել, զվարճալի տիկնիկային թատրոններ ու ներկայացումներ դիտեցին, գեղեցիկ ձեռային աշխատանքներ պատրաստեցին: Բակային ճամբարի ընթացքում երեխաները նոր ընկերներ ձեռքբերեցին, գյուղի և քաղաքի երեխաները մտերմացան, վայելեցին Աստծո սերը և վերադարձան տուն: