Գյումրու Հայաստանյայց Ավետարանական համայնքի համար 2018թ.-ի հունվարի 6-ը պատմական էր: Այս տարվա Սուրբ Ծնունդը՝ տարվա առաջին պաշտամունքը, տեղի ունեցավ նորակառույց եկեղեցաշենքում: Ու թեեւ եկեղեցաշենքի պաշտոնական բացումը դեռեւս չի եղել, համայնքն արդեն վայելում է նոր հարմարությունները:
Եկեղեցու ծառայողները և անդամները չէին կարող զսպել իրենց հիացմունքը և ուրախությունը՝ ավելի հարմարավետ և գրկաբաց եկեղեցաշենքում Աստծուն պաշտելու համար: Աստված անմոռանալի նվեր մատուցեց Գյումրու ժողովրդին՝ Գյումրու հենց կենտրոնում Ամերիկայի Հայ Ավետարանչական Ընկերակցության միջոցով, կառուցելով այդ հիանալի եկեղեցաշենքը:
Պաշտամունքին ողջույնի խոսքով հանդես եկան Գյումրու ՀԱԵ եկեղեցու ծառայողներ Գրիգոր Վարդանյանը, Արմեն Թադևոսյանը, ԱՀԱԸ Գյումրու գրասենյակի ղեկավար Կարեն Մանուկյանը և Վերապատվելի Համլետ Կյուրեղյանը: Պաշտամունքը զարդարեցին Կիրակնօրյա դպրոցի սաները և քույրականի քույրերը:
Թող որ Աստված նման անգին նվերներ մատուցի մեր այն համայնքներին, ովքեր դրա կարիքն ունեն և Աստծո Հոգու առաջնորդությամբ շունչ հաղորդեն այդ շինություններին:
Շնորհավոր Սուրբ Ծնունդ
Կարեն Մանուկյան
