.
Աղոթքի շաբաթ Արցախի համար: ՀԱԵ ծառայողներն ու անդամները աղոթում են ամեն օր...

Վերջին օրերին Արցախի սահմանին տիրող պատերազմական իրավիճակը ոտքի հանեց ոչ միայն հայոց բանակն ու մարտնչելու պատրաստ հազարավոր կամավորների, այլեւ աղոթողների բանակը, ովքեր իրենց լուռ աղոթքով են ամեն օր զինվորի կողքին: Հայաստանյայց Ավետարանական Եկեղեցին միասնական աղոթքի շաբաթ է սկսել: Ապրիլի 10-ից սկսած, ամեն օր ժամը 18:00-ին, ՀԱԵ բոլոր եկեղեցիները Երևանում՝ Բաղրամյան 18 հասցեում, և շրջաններում միասնական աղոթք են բարձրացնելու մեր երկրի խաղաղության և ապահովության համար:
Կարեւոր է, որ մենք՝ որպես քրիստոնյա, հավատացյալ ժողովուրդ, հիշենք Աստծո հետևյալ խոսքը. «Բարձրյալի ծածկոցի տակ բնակվողը՝ Ամենակարողի հովանավորության տակ է հանգստանում» Սաղմոս 91.1։ 
Ավելի քան 1700 տարի հայ ժողովուրդը փորձառաբար տեսել, էապես գիտակցել և խորապես հավատացել է երկինքն ու երկիրը ստեղծող իրական Աստծուն, Ով Իր Միածին Որդու միջոցով մեզ Իր ընտանիքն է դարձրել և Իր սեփական ժողովուրդը (Ա.Պետրոս 2.9-10):
Բարձրյալ Աստված Իր ծածկոցի տակ է վերցրել մեր երկիրը, մեր սահմանները, մեր զինվորներին ու մեր ժողովրդին և Իր ապահով ձեռքերում ենք մենք մեր հանգիստը գտնում։ 
Նա է մեր ապավենը և միակ հույսը, որին հուսացել ենք։ Նա Իր հրեշտակների միջոցով պիտի պահի մեզ այս ընթացքի մեջ․ «Որովհետև իր հրեշտակներին հրամայել է քեզ համար, որ պահեն քեզ քո բոլոր ճանապարհներում» Սաղմոս 91.11։
Ուրեմն եկեք միաբանվենք աղոթքով, Աստծուն ուղղենք մեր աղերսանքը Հայաստանի ու Արցախի համար և Իր թևերի տակ վերագտնենք մեր հանգիստն ու ապահովությունը։

 

Նախորդ
...
X